Proclamatie Sjtadsprins Roel d'r Ieësjte va Gebrook ·
Vier, Prins Roel d'r Ieësjte, Sjtadsprins va Gebrook biej de grasie va d'r Wieze Raod, Graaf uëver alle kesjtieëlule, - ulinnekes en - uulskukes, Markies uëver Groeët Gebrook va Lot- en Uëverbrook pis aa de Passart en van 't kesjtieël pis bienao Aostrao, Hertog uëver alle Gebreuker en Gebreukerinnekes die same mit mich en 't CCH, va Gebrook 'n richtige narresjtad gònt make, Proklamere de noe volgende elf raegels,
Ten 11e
Väöl luuj óm mich haer höbben´ t al jaore geropen en gedach
Mennigaen höb ich doer ´t neet te waere al i de sjölde gebrach
Noe is mien geheim van ´t aafgelaope jaor eindelik oetgekómme
En sjtaon ich hiej es Sjtadsprins va Gebrook mit mien nóndejuke gebónge
Ten 10e
Al 46 Breuker jónge zint mich i dit ambt vuuër gegaon
En dit höbbe ze nuij op ´n fantastiese meneer gedaon
Thijs d’r Ieëjste is zieëker ´n vuuërbild vuuër mich
Juus wiej häöm, gaon aoch ich dit jaor vuërop, mit mien lachend vastelaovesgezich
Ten 9e
Lendi mannenmode kleidt al 50 jaor ´t CCH, miene opa is daomit begónne
En nao mienen opa en pap höb ich dees tradisie uëvergenómme
Dit jaor waor d´r letste kier dat miene pap dit haat gemaete en gemak
Daoróm bin ich extra gruëtsj dat ich hiej sjtao mit sjtieëk, vaeren en dit prachtige prinsepak
Ten 8e
´t Sociale netwerk haat aoch binne d’r Breuker Vastelaovend zien intraeje gedaon
Väöl wietse, tekste, foto’s en sjaele kal höb ich hiej d´r letste tied aa mich vuuërbiej zien gaon.
Wae d’r nuje Prins zal waere is op Facebook, Twitter en Hyves ´n ware hit,
Dat ich hiej noe sjtaon is ´t bewies dat in al dat sjpikkelere ech waal ´n kern va waorhaed zit
Ten 7e
’t Optochkomitee en ’t CCH zint weer biejaen
Aoch de wageboewesj laote dit i d´r optoch zieën, aa jieëkeraen
Dus doot allemaol mit, i de sjtoet of aa d´r kant
Da zette vier Gebrook op de kaart in oos Limburgs land.
Ten 6e
Haelder gaet i Gebrook flink get investere
Ich ving dat dit aoch waal ‘ns tied maag waere
In ´t auwd gemaentehoes kins te sjtraks vuuër dien gezóndhaed alles vinge
En mit ´t masterplan gaet Gebrook ´t zieëker bringe
Ten 5e
‘t Breuker Vastelaovesleedjes Konkoer zörgde dit jaor weer vuuër väöl sjpanning en plezeer
14 entoesiaste groepe zörgde vuuër sjoene moezik, peksjkes en väöl sfeer
De Breuker Nuëtjes waore vuuër ´t twieëde jaor op riej de beste, nao ´t sjtumme via sms
Same zingen uëver ´n plaatsj woes te dich thoes väöls, bleek ´n groeët sukses
Ten 4e
Mit slingesj, lempkes, en nog väöl anger toebehuëre
Zörge de hoesverseerders jieëker jaor weer vuuër väöle kluëre
Dizze kier höbbe ze waal ´n extra zjwaore taak
want 15 mieëter gieëvel i de Kouvendersjtraot behuurt tot mien zaak
Ten 3e
Mit Gaby mien verloofde aa mien hand
Höb ich mien eige prinses in oos Breuker land
Es heerser va Gebrook trouwen i dit prachtige kesjtieël
Waer ich d´r maest gruëtsje prins va dizze ieëw
Ten 2e
Es prins va basissjoeël de Regenboog is ´t Vastelaovesgeveul biej mich óntsjtange
En daonao is ´t noets mieë weg gegange
Zoe höb ich d’r Breuker Vastelaovend al es klaene Jóng mage belaeve
Dit is ‘t sjoeënste fieës va gans ´t jaor, dat is ´n gegaeve
Ten 1e
Nao al mien gekal is ´t noe genóg gewaes
’t waert tied óm te sjtarte mit dit prachtig vastelaovesfieës
Es Sjtadsprins Roel I vraog ich uch allemaol óm te gaon zinge, sjpringe en sjtaon
Zoedat ich same mit uch de vastelaovend i kin gaon!
Gegaeve i Gebrook op 14 jannewari 2012.
Sjtadsprins Roel d’r Ieësjte , biejgesjtange doer prizedent Ton en ziene Wieze Raod van ´t vastelaovesriek Gebrook.